Политика за приватност

1. Контролор и обработувач

Контролор на личните податоци поврзани со корисничката сметка е Друштво за производство, трговија и услуги ИНМАК ДОО Скопје(„ние“). За податоците што адвокатската канцеларија ги внесува за своите предмети (имиња на клиенти, спротивни страни и слично), канцеларијата е контролор, а Јустинијан Роковник настапува како обработувач што ги чува и обработува тие податоци исклучиво по налог на канцеларијата и за потребите на Услугата.

2. Кои податоци ги собираме

• Податоци за сметката: е-пошта, лозинка (хаширана), име и презиме, назив на канцеларија, ЕМБС/уписен број, град.
• Податоци за предметите: информации што ги внесува канцеларијата — предмети, рочишта, рокови, обврски, контакти, документи, имиња на странки. Овие може да содржат лични податоци на трети лица за кои канцеларијата е контролор.
• Технички податоци: IP адреса, тип на уред и прелистувач, приближно место (град и држава според IP адресата) и време на пристап — за безбедност и водење дневник на најави и активности (audit).

3. Правен основ за обработка

• Извршување на договор — обработката е неопходна за обезбедување на Услугата за која сте се регистрирале.
• Легитимен интерес — безбедност на системот, спречување злоупотреба и подобрување на Услугата.
• Законска обврска — издавање и чување на сметководствена документација (профактури/фактури) согласно прописите на РСМ.

4. Како ги користиме податоците

• Обезбедување на функциите на Услугата (предмети, рочишта, обврски, документи, календар)
• Администрација на кориснички сметки и канцеларии
• Наплата на претплата (профактури и фактури)
• Безбедносни дневници и заштита од злоупотреба

5. Споделување со трети страни

Вашите податоци не ги продаваме и не ги споделуваме за маркетинг. Ги користиме следните доверливи обработувачи, кои обезбедуваат соодветно ниво на заштита:

• Supabase — база на податоци, автентикација и складирање на документи
• Vercel — хостирање на апликацијата
• Sentry — пријави за технички грешки во апликацијата (сервери во ЕУ): само каде и зошто настанала грешката — без е-пошта, IP-адреса и пребарувања

6. Задржување на податоци

Податоците за предметите се чуваат додека канцеларијата не ги избрише или не побара бришење на сметката. По истек на претплатата, податоците остануваат зачувани и достапни повторно по обновување. Администраторот на канцеларијата во секое време — и по истекот — може да ги преземе сите внесени податоци и документи (Извоз на податоци). По барање за бришење на сметка, податоците се отстрануваат во разумен рок, освен она што мораме да го задржиме по закон.

Дневник на активности (кој што направил и кога) се брише автоматски: записите поврзани со предмет — 3 години по затворањето на предметот; другите записи — по 1 година; записите за давање и одземање пристап, безбедност (двостепена потврда, лозинка), извоз на податоците, клиентскиот портал и бришење предмет — по 3 години. Известувањата пратени до странката се чуваат како и предметот. Документите не се бришат автоматски — канцеларијата ги брише сама (апликацијата потсетува 6 месеци по затворањето на предметот). Сметководствената документација (нарачки и фактури) се чува согласно законските рокови.

Дневник на најави (секоја најава и неуспешен обид за најава: кој, кога, уред, приближно место, IP адреса, дали е потврдена со код и кога е завршена сесијата) се води согласно Правилникот за безбедност на обработката на личните податоци и се брише автоматски по 1 година. Корисникот ги гледа своите најави, а администраторот на канцеларијата — најавите на својот тим и на странките во клиентскиот портал. Записите не може да ги измени ни избрише никој, вклучително и администраторот; при најава од нов уред членот добива известување по е-пошта.

7. Ваши права

Согласно Законот за заштита на личните податоци на РСМ и GDPR, имате право на пристап, исправка, бришење, преносливост, приговор и ограничување на обработката. Преносливоста ја остварувате сами, преку „Извоз на податоци“, во структуриран формат (Excel). За остварување на другите права контактирајте нè преку податоците во Импресумот.

8. Колачиња (Cookies)

Користиме исклучиво функционални колачиња неопходни за работа на апликацијата (одржување на Вашата сесија). Не користиме аналитички, рекламни или колачиња за следење од трети страни.

9. Безбедност

Применуваме технички и организациски мерки за заштита: шифрирана комуникација (HTTPS/TLS), хаширање на лозинки, изолација на податоците по канцеларија на ниво на база (Row Level Security), ограничување на барања и безбедносни заглавија.

10. Измени на политиката

Задржуваме право на измена на оваа Политика. За значајни промени ќе Ве известиме преку апликацијата или е-пошта. Датумот на последната измена е наведен на почетокот.

11. Контакт и надзорен орган

За прашања поврзани со заштита на лични податоци контактирајте нè преку Импресумот. Имате право да поднесете претставка до Агенцијата за заштита на личните податоци на РСМ (dzlp.mk).